Quatro Superieure Simbra Genetika is die uitvloeisel van die visie en doelwitte van vier Simbra telers van die volgende kuddes: Happy Venture, Mica, SSS en Vleisberg. Hierdie 4 telers het na hul mekaar beter leer ken het, ontdek dat hulle soveel in gemeen het, dat hulle deur hul kragte saam te snoer soveel meer doeltreffend, doelgerig en effektief te werk kan gaan ten einde hierdie doelwitte te verwesenlik. Gevolglik is daar in 2007 besluit om kragte op ‘n formele wyse saam te span en is die Quatro groep met die hoofdoel die daarstelling van Superieure Simbra Genetika gestig.

Een van die vele uitdagings van stoetteling is die beskikbaarheid en koste verbonde aan top genetika. Deur middel van samewerking tussen die lede van Quatro kon kapitaal meer effektief aangewend word, en is daar ook onderling ooreengekom om genetika aan mekaar beskikbaar te stel tot voordeel van mekaar en die gemeenskaplike doelwit van die Quatro lede.

Dit het meegebring dat diere gesamentlik gekoop is ten einde die genepoel te verbreed asook om ‘n embrio program van stapel te stuur. Daar is ook waar dit nodig geag was van ingevoerde semen asook van die beste plaaslike semen gebruik gemaak in beide die teling in die onderskeie kuddes, asook in die embrioprogram. Die voorlopige resultate van die embriokalwers wat aangekom het lyk baie belowend, en hoewel dit ‘n baie duur oefening was, wil dit voorkom asof daar beslis diere van superieure gehalte geteel is, en gevolglik voel ons dat die oefening geslaagd was. Die onderlinge uitruil van bulle en semen onder die lede van Quatro blyk ook ‘n suksesverhaal te wees.

Behalwe vir die genetiese vordering wat gemaak is in die onderskeie kuddes, het die samewerking tussen die Quatro lede meegebring dat daar jaarliks in Augustus ‘n veiling te Otterskuilen, tussen Standerton en Heidelberg (Happy Venture) aangebied word. Die gevoel van die vier telers was dat ‘n jaarlikse produksieveiling, waar die aanbied van top gehalte diere, druk plaas op die genetiese sterkte van so ‘n individuele kudde, die logiese oplossing daarin lê om gesamentlik die Quatro veiling aan te bied. Hierdeur word die beskikbaarstelling ‘n groot aantal diere van top gehalte verdeel tussen al die lede, wat meebring dat daar nie onredelike druk geplaas word op hul afsonderlike kuddes nie. Dit is net soveel makliker om byvoorbeeld 10 top diere uit elk van 4 kuddes aan te bied as die 40 top diere uit een kudde. Die Quatro veiling het ten doel om genetika van hoogstaande gehalte aan die bedryf beskikbaar te stel en sodoende ‘n bydrae te lewer tot die verbetering en uitbou van die Simbra ras in geheel.