was vir ons belangrik aangesien ons die stoet kudde ook op ‘n ekstensiewe basis bestuur. Ons lê baie klem op gehardheid en aanpasbaarheid, wat weerspiëel word in die reproduksie van ‘n koei. Hierdie groep koeie het vir ons die basis gegee waarop ons kon voortbou.

Ons grootste bate was die aankoop van ons eerste stoetbul, die alombekende Ben (DM98155C) uit die welbekende Kamab stoet van Diethelm Metzger in Namibië. Ons was werklik geseënd met die voorreg om so ‘n top bul as eerste stoetbul te kon bekom. Goeie blupwaardes is vir ons baie belangrik en hier was Ben uitstaande met die neerlegging van puik blupwaardes in sy nageslag. Dit is dan ook juis danksy hom dat ons kudde spog met uitstekende blupsyfers. Die Ben dogters is tans die basis waarop die kudde nou voortgebou word.

Happy Venture Simbras het nog ‘n been waarop sterk gesteun word. Dit is die teel van F1’s uit ‘n paar rooi en wit Brahman koeie. Ons poog om ‘n sterk lyn uit die koeie te vestig aangesien dit onverwante genetika aan die meeste bekende bloedlyne is. Tans word ‘n poena Simmentaler bul, Macarara Yodick op die koeie, sowel as ‘n aantal halfkruis verse met groot sukses gebruik. Sodoende kon ons alreeds heelwat onverwante poenas op die grond kry.

Die poena faktor geniet tans by ons groot aandag en daarom gebruik ons nou heelwat semen van poena bulle op ons vroulike diere. Dit is vir ons ‘n groot eer dat Happy Venture Dalton in 2006 as die genootskap se nuwe KI bul aangewys is. Dalton was dan ook in 2005 die duurste Simbra bul wat vir R46 000 op die Nasionale veiling verkoop is. Dalton is alreeds met groot vrug gebruik en daarvan getuig die kalwers wat alreeds op die grond is.

Die Amerikaanse poena, Full House, is alreeds gebruik om die poena geen verder te vestig. Sy eerste kalwers word binnekort verwag.

Dit is vir ons ook belangrik om aktief betrokke te wees in die Simbra bedryf om sodoende ook ‘n bydrae te lewer tot die bevordering en uitbouing van hierdie uitstekende ras. Dit is juis ook om hierdie rede dat ons op verskeie skoue beeste vertoon. Dit is vir ons ‘n ideale vertoonvenster en ook ‘n goeie maatstaf om ons eie beeste te vergelyk met van die beste Simbras wat vertoon word. Ons is ook aktief betrokke by die Overvaal Sim Studiegroep en neem ook deel aan die Overvaal Superbul program.

Ons seleksie beleid word bepaal deur die volgende faktore en eienskappe: vrugbaarheid, groei, bespiering en temperament. Die poena faktor is vir ons belangrik, maar nie ten koste van bogenoemde eienskappe nie. Die poena faktor het tans groot ekonomiese waarde vir die stoetteler sowel as die kommersiële boer.

Dit is vir ons ‘n voorreg om ons produksieveiling saam met Marimbra Simbras, SSS Simbras en Mica Simbras van Namibië aan te bied. Ons is trots om deel te wees van die Quatro Simbra groep. Dit was ‘n logiese besluit gewees, aangesien ons teel doelwitte en mikpunte in ‘n groot mate ooreenstem en ons almal ‘n groot passie het vir die teel van top kwaliteit Simbras. Ons beskou die samewerking met ander telers as baie belangrik, gevolglik is ons in noue samewerking met elk van bogenoemde telers.